ព័ត៌មានតាមបណ្តារខេត្ត

ការរៀបចំសណ្តាប់ធ្នាប់សាធារណៈ ការចតយានយន្ត និងការប្រើប្រាស់ចិញ្ចើមផ្លូវ

បាត់ដំបង៖ បន្ទាប់ពីមន្ត្រីជំនាញភ្លេងបុរាណ ការិយាល័យសិល្បៈទស្សនីយភាព នៃមន្ទីរវប្បធម៌ និងវិចិត្រសិល្បៈខេត្តបាត់ដំបង បានចុះបង្ហាត់បង្រៀន ដល់ក្រុមភ្លេងពិណពាទ្យ ទេព បូរិន វប្បធម៌ខ្មែរ ចំនួនពីរលើករួចមក នៅរសៀលថ្ងៃទី០២ ខែកក្កដា ឆ្នាំ២០២៦ បានធ្វើពិធីបិទវគ្គបណ្តុះបណ្តាល ស្តីពីភ្លេងបុរាណខ្មែរ ” ភ្លេងពិណពាទ្យ “ និងការចែកវិញ្ញាបនបត្រ ដល់ក្រុមភ្លេងពិណពាទ្យ ទេព បូរិន វប្បធម៌ខ្មែរ ដែលរៀបចំឡើង នៅសាលប្រជុំមន្ទីរវប្បធម៌ និងវិចិត្រសិល្បៈខេត្ត ដោយមានការអញ្ជើញចូលរួមពី លោក គឹម សោភ័ណ្ឌ ប្រធានមន្ទីវប្បធម៌ និងវិចិត្រសិល្បៈខេត្តបាត់ដំប លោក លោកស្រី អនុប្រធានមន្ទីវប្បធម៌ និងវិចិត្រសិល្បៈខេត្ត ព្រមទាំងមន្រ្តីរាជការជាច្រើនរូបទៀត។

បាត់ដំបង៖ របាំបញ្ជាន់ស្រូវ គឺជារបាំប្រជាប្រិយមួយ ដែលឆ្លុះបញ្ចាំងពីទិដ្ឋភាពជីវភាពសហគមន៍កសិករ និងភាពសប្បាយរីករាយ ក្នុងរដូវប្រមូលផល នេះបើតាមការលើកឡើង របស់លោក គួយ វិច្ឆិកា អនុប្រធានការិយាល័យសិល្បៈទស្សនីយភាពនៃមន្ទីរវប្បធម៌ និងវិចិត្រសិល្បៈខេត្តបាត់ដំបង។ របាំនេះ ដើមឡើយត្រូវបានបង្កើតឡើង ដោយជនជាតិភាគតិចព័រ ក្នុងស្រុកសំឡូត ខេត្តបាត់ដំបង ដែលបង្ហាញអំពីវិធី សាស្ត្រនៃការប្រមូលផលស្រូវបែបបុរាណ និងសាមគ្គីភាព ការជួយយកអាសារគ្នា របស់ប្រជាកសិករ ក្នុងសហគមន៍ ជាពិសេសចង់បង្ហាញ អំពីតម្លៃនៃស្រូវអង្ករ ដែលជា “មាសស” របស់កម្ពុជា។

បាត់ដំបង៖ គណៈកម្មាធិការសមាគមអតីតយុទ្ធជន និងនិវត្តជន (អ.ន.ក) ខេត្តបាត់ដំបង និងខេត្តប៉ៃលិន បានបើកវគ្គបណ្ដុះបណ្ដាលស្ដីពី «ការងាររដ្ឋបាល និងការងារបេឡាមរណសង្គ្រោះ» ក្រោមអធិបតីភាព ឯកឧត្តម អ៊ុក ឃ្នួច អគ្គលេខាធិការរងសមាគមថ្នាក់ជាតិ និងឯកឧត្តម សុខ លូ អភិបាលខេត្ត និងជាប្រធាន អ.ន.ក ខេត្តបាត់ដំបង នៅសាលប្រជុំសាលាខេត្តបាត់ដំបង នាថ្ងៃទី ២៥ ខែមិថុនា។

បាត់ដំបង៖ សាខាកាកបាទក្រហមកម្ពុជាខេត្តបាត់ដំបង បានបើកកិច្ចប្រជុំបន្ទាន់មួយជាមួយមន្ទីរ អង្គភាព និងអាជ្ញាធរក្រុង-ស្រុកទាំង១៤ ដើម្បីពង្រឹងយុទ្ធនាការកៀរគរមូលនិធិ ក្នុងឱកាសខួបលើកទី១៦៣ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ២០២៦ ក្រោមមូលបទ «បន្តរួមកម្លាំងគ្នា ដើម្បីមនុស្សធម៌»។

បាត់ដំបង៖ ឯកឧត្តម ម៉ម ប៊ុននាង ប្រធានគណៈកម្មការអង្កេត បោសសម្អាត និងប្រឆាំងអំពើពុករលួយ (គណៈកម្មការទី១០) នៃព្រឹទ្ធសភា បានដឹកនាំគណៈប្រតិភូព្រឹទ្ធសភា រួមជាមួយគណៈប្រតិភូមូលនិធិចែករំលែកសង្គ្រោះជីវិតសកល (GLS) នៃសាធារណរដ្ឋកូរ៉េ ចូលជួបពិភាក្សាការងារជាមួយថ្នាក់ដឹកនាំរដ្ឋបាលខេត្តបាត់ដំបង នៅសាលប្រជុំសាលាខេត្តបាត់ដំបង កាលពីថ្ងៃទី២៤ ខែមិថុនា ឆ្នាំ២០២៦។

បាត់ដំបង៖ឯកឧត្តម អ៊ុក ឃ្នួច អគ្គលេខាធិការរងតំណាងឯកឧត្តមនាយឧត្តមសេនីយ៍កិត្តិសង្គហបណ្ឌិត គន់ គីម ទេសរដ្ឋមន្រ្តីអនុប្រធាន និងជាអគ្គលេខាធិការសមាគមអតីតយុទ្ធជន និងនិវត្តជនកម្ពុជា និងឯកឧត្តម សុខ លូ អភិបាលខេត្ត និងជាប្រធានគណៈកម្មាធិការសមាគមអតីតយុទ្ធជន និងនិវត្តជន(អ.ន.ក)ខេត្តបាត់ដំបង បានអញ្ជើញជាអធិបតីក្នុងវគ្គបណ្ដុះបណ្ដាលស្ដីពីការងាររដ្ឋបាល និងការងារបេឡាមរណសង្រ្គោះសមាគមអតីតយុទ្ធជន និងនិវត្តជនជូនថ្នាក់ដឹកនាំក្រុមការងារនៃគណៈកម្មាធិការ អ.ន.ក ខេត្ត ក្រុង ស្រុក និងសាខាឃុំ សង្កាត់ ខេត្តបាត់ដំបង និងខេត្តប៉ៃលិន។វគ្គបណ្ដុះបណ្ដាលនេះធ្វើឡើងនៅថ្ងៃទី២៥ ខែមិថុនា ឆ្នាំ២០២៦ នៅសាលប្រជុំសាលាខេត្តបាត់ដំបង។

បាត់ដំបង៖ លោកអភិបាលស្រុកឯកភ្នំ បានដឹកនាំកងកម្លាំងប្រដាប់អាវុធ មន្ត្រីរាជការ និងក្រុមការងារពាក់ព័ន្ធ ចូលរួមធ្វើពលកម្មសម្អាតអនាម័យបរិស្ថាន និងថែទាំកូនឈើតាមដងផ្លូវ ក្នុងភូមិសាស្ត្រឃុំព្រែកនរិន្ទ ស្រុកឯកភ្នំ ខេត្តបាត់ដំបង។ សកម្មភាពនេះ ត្រូវបានរដ្ឋបាលស្រុកបង្ហោះលើបណ្តាញសង្គមហ្វេសប៊ុក កាលពីព្រឹកថ្ងៃទី២៤ ខែមិថុនា ឆ្នាំ២០២៦។

បាត់ដំបង៖ ដើម្បីធានានិរន្តរភាព និងប្រសិទ្ធភាពខ្ពស់ក្នុងការគ្រប់គ្រងទឹកសម្រាប់វិស័យកសិកម្ម លោក ឃឿន សុខុម អនុប្រធាននាយកដ្ឋានសហគមន៍កសិករប្រើប្រាស់ទឹក នៃក្រសួងធនធានទឹក និងឧតុនិយម បានដឹកនាំក្រុមការងារចុះត្រួតពិនិត្យ និងជួបសំណេះសំណាលពង្រឹងសហគមន៍កសិករប្រើប្រាស់ទឹក (ស.ក.ប.ទ.) នៅប្រព័ន្ធធារាសាស្ត្រដូនទាវ កាលពីថ្ងៃទី ២២ ខែមិថុនា ឆ្នាំ ២០២៦ ស្ថិតក្នុងឃុំពាមឯក ស្រុកឯកភ្នំ ខេត្តបាត់ដំបង។

បាត់ដំបង៖ កិច្ចប្រជុំសាមញ្ញលើកទី២៥ របស់ក្រុមប្រឹក្សាខេត្តបាត់ដំបង អាណិតទី៤ បានប្រព្រឹត្តទៅ នារសៀលថ្ងៃទី១៩ ខែមិថុនា ឆ្នាំ ២០២៦ នៅសាលប្រជុំសាលាខេត្តបាត់ដំបង អគារE ក្រោមអធិបតីភាព ឯកឧត្តម អ៊ុយ រី ប្រធានក្រុមប្រឹក្សាខេត្តបាត់ដំបង និងដោយមានការអញ្ជើញចូលរួមពី ឯកឧត្តម សុខ លូ អភិបាលនៃគណៈ អភិបាលខេត្តបាត់ដំបង ឯកឧត្តម លោកជំទាវ សមាជិកក្រុមប្រឹក្សាខេត្ត អភិបាលរងខេត្ត និងលោក លោកស្រី ប្រធាន អនុប្រធានមកពីមន្ទីរអង្គភាពពាក់ព័ន្ធក្នុងខេត្ត។

បាត់ដំបង៖ ក្រោយមានការបង្ហោះវីដេអូ TikTok ព្រះសង្ឃមួយអង្គគង់នៅវត្តសំរោងលើ ចាក់សាក់លើរាងកាយស្ត្រីម្នាក់ បង្កការរិះគន់ថាខុសពីវិន័យសង្ឃ មន្រ្តីជំនាញ និងអាជ្ញាធរស្រុកគាស់ក្រឡ ខេត្តបាត់ដំបង បានចុះស្រាវជ្រាវភ្លាមៗ និងរកឃើញថាមានករណីនេះពិត។ បន្ថែមពីនេះ ក៏បានរកឃើញថាព្រះសង្ឃអង្គនោះ និងព្រះសង្ឃ ៤ អង្គផ្សេងទៀតមានប្រើប្រាស់សារធាតុញៀនផងដែរ។

បាត់ដំបង៖ ដើម្បីឆ្លើយតបទៅនឹងតម្រូវការចាំបាច់របស់ប្រជាពលរដ្ឋ ក្រុមការងារជំនាញបានប្រើប្រាស់គ្រឿងចក្រធុនធ្ងន់ជាច្រើន សម្រុកធ្វើសកម្មភាពជួសជុល និងថែទាំជាបណ្តោះអាសន្នលើកំណាត់ផ្លូវលេខ ៣ ក៏ដូចជាខ្សែផ្លូវមួយចំនួនទៀតក្នុងក្រុងបាត់ដំបង ដែលមានចរាចរណ៍មមាញឹក។