ស្រុកតាលោសែនជ័យ ប្រកាសតែងតាំងអភិបាលរងស្រុកថ្មី ១រូប ដើម្បីពង្រឹងប្រសិទ្ធភាពការងាររដ្ឋបាលនិងអភិវឌ្ឍមូលដ្ឋាន
(ពោធិ៍សាត់)៖ លោក ពៅ ពិសិដ្ឋ អភិបាលរងខេត្ត តំណាងដ៏ខ្ពង់ខ្ពស់ ឯកឧត្ដម ខូយ រីដា អភិបាលនៃគណៈអភិបាលខេត្តពោធិ៍សាត់ បានអញ្ជើញជាអធិបតីក្នុងពិធីប្រកាសចូលកាន់មុខតំណែងអភិបាលរង នៃគណៈអភិបាលស្រុកតាលោសែនជ័យ ចំនួន ០១រូប នារសៀលថ្ងៃទី០២ ខែកក្កដា ឆ្នាំ២០២៦។ ពិធីនេះត្រូវបានរៀបចំឡើងនៅសាលាស្រុកតាលោសែនជ័យ ដោយមានការចូលរួមពីសំណាក់ ថ្នាក់ដឹកនាំក្រុមប្រឹក្សា និងគណៈអភិបាលស្រុក តំណាងសាលាដំបូង និងអយ្យការអមសាលាដំបូងខេត្ត មន្ទីរ-អង្គភាពជុំវិញខេត្ត កងកម្លាំងប្រដាប់អាវុធ មន្ត្រីរាជការ លោកគ្រូ-អ្នកគ្រូ យុវជន និងបងប្អូនប្រជាពលរដ្ឋយ៉ាងច្រើនកុះករ។ ការប្រកាសចូលកាន់មុខតំណែងនេះ ធ្វើឡើងក្នុងគោលបំណងពង្រឹងរចនាសម្ព័ន្ធដឹកនាំ បង្កើនប្រសិទ្ធភាពការងាររដ្ឋបាល និងជំរុញការអភិវឌ្ឍមូលដ្ឋានស្រុកតាលោសែនជ័យឱ្យកាន់តែរីកចម្រើនបន្ថែមទៀត៕
